လိပ်ပြာကြိုး🦋

ကံဆိုးသူ သွားမယ့်နောက်

မိုးကလိုက်ရွာတယ်

မှတ်မှတ်ရရ အဲ့ဒီနေ့ကမိုးရွာတယ်

ငါ့အမေမှာ ကိုယ်ဝန်အရင့်အမာကြီးနဲ့

စောက်ကျိုးတွေနည်းချက်က

နေ့မစေ့လမစေ့ ငါ့အမေက

ဖျာကိုငြိပြီး လဲတယ်

အဲ့ဒီနေ့မှာ

စောက်ကျိုးတွေ စများတော့တာပဲ

"အူဝဲ"လို့အော်သံကြားရမယ့်အစား

ဘုရားတတဲ့ အသံတွေဆူညံခဲ့မယ့်နေ့ ။

အမြွာတဲ့ဟေ့လို့ ကြားတော့

ငါ့အဖေလက်မောင်းနှစ်ချက် ခတ်တယ်

ဝဠာစည်ကြီး နှစ်ချက်တီးတဲ့ဒဏ်

ငါ့အမေဝမ်းကတော့

ပင်ပန်းမှုကို တော်တော်လေးခံခဲ့ရမှာ...

ကံတရားဆိုတာ

ဘယ်သူမှကြိုမသိတဲ့ ကုသိုလ်တဲ့

ငါတို့အလှည့်ကျမှ

ဘယ်ဘဝက အကုသိုလ်လဲ

ဖိတ်စာမပါတဲ့ လိပ်ပြာနှစ်ကောင်လုံး

ရှိုက်ငိုသံလေးတွေ ဝေးခဲ့ရ

လောကဓံကို ကန်မယ့်

ငါတို့ခြေထောက်လေးတွေ ငြိမ်နေခဲ့ရ

ဘဝမှာ အရှုံးပေးစရာတွေ သိပ်များတဲ့အကြောင်း

တရားခွေအဟောင်းလေးနဲ့ ကြားနာရမှာ

​

ကံကောင်းတဲ့အချက်က

အသံမထွက်ပဲ အသက်ရှင်တဲ့သူရှိတယ်

ကံမကောင်းတဲ့အချက်က

အဲ့ဒီ ဇီဝကမ္မကြိုးလေးဆက်သူဟာ

ငါဖြစ်ခဲ့တယ်

ငါ့ညီမလေးခမျာ

ဒီတောင်ကိုမကျော်နိုင်ခဲ့ဘူး

ငါ့ညီမလေးဟာ ဒီခရီးမနီးခဲ့ဘူး

ဒီခရီးဖြတ်ခဲ့တဲ့ကောင် (အခုထိ)

ဒီတောင်ကြီး တက်နေတဲ့ကောင်ကျ

ဆက်ပြီးသွားနေရတယ်

ငါအခုပင်ပန်းလှပြီ ညီမလေးရေ...

ခုနှစ်လသားကောင်လေးဘဝ

ရွယ်တူတွေကြားထဲ ကစားဖော်ရှာတော့

မျက်လုံးလေး ဝိုင်းခဲ့ရ

မိသားစုကြား စကားပြောဖော်ရှာတော့

အသံထွက်အရုပ်လေးတွေ ဝိုင်းခဲ့ရ

ငါ့ဘဝမှာ လိုချင်တာအကုန်ရခဲ့ပေမယ့်

မင်းကိုမရခဲ့ဘူး ညီမလေး

မင်းကိုလိုက်စလို့ လက်သီးထိုးသတ္တိပြရတဲ့

အစ်ကိုတစ်ယောက် ဖြစ်ချင်ခဲ့တာ

မင်းလိုသမျှကို လက်ညိုးထိုးပြစရာမလိုတဲ့

မင်းရဲ့အစ်ကို ဖြစ်ချင်တာ

မဖြစ်နိုင်တာမရှိဘူးဆိုတဲ့လောကမှာ

မင်းက ဘယ်ရောက်နေလို့လဲ ညီမလေးရေ...

သိပ်ချစ်ကြတဲ့ မောင်နှမတွေမြင်ရင်

ငါတို့ဘဝကို မြင်ယောင်မိတယ်

တစ်ဦးတည်းသော သားကဆိုးပါတယ်

ငါ့ကိုဆူမယ့်အသံလေး မက်မောမိတယ်

ငါ့ကိုအနိုင်ကျင့်မယ့်အရံကလေး

ငါမက်မောမိတယ်...

ညီမလေးရေ

ပျောက်တဲ့လူက ပျောက်သွားတဲ့အခါ

မနေတတ်သူတွေ နေခဲ့ရ

ပျောက်တဲ့သူကြာရင်မေ့ ဆိုပေမယ့်

တမ်းတစရာတွေ တွေ့ရင်

ဘယ်မေ့လို့မှာလဲ

ဘယ်ဘဝမှာ ငါတို့ကိုမေ့လို့နေပြီလဲ

ငါတို့မိသားစု ထမင်းဝိုင်းကလေးမှာ

ပန်းကန်လေးတစ်ချပ်စာတိုးရုံ

ငါတို့အိမ် အခန်းတိုင်းမှာ

အိပ်ရာခင်းလေးတစ်ခုစာတိုးရုံ

ဒါက ပုံပြင်တစ်ပုဒ်ပါ ညီမလေးရေ

မင်းရဲ့ဇာတ်လမ်းက ဆိုးလိုက်တာ...

နောက်တစ်ခေါက်လောက်

ကြိုးစားခွင့်ရမယ်ဆိုရင်

ငါ့နေရာမှာ မင်းကိုဝင်စေချင်တယ်

အသက်ရှူသွင်းတာ 

အရင်ရောက်မယ့်ပန်းတိုင်ဆို

ဒီပြိုင်ပွဲကြီး ငါထပ်မပြိုင်ချင်တော့ဘူး

အံစာတုံးခေါက်လို့ ကျပန်းကျရုံလောက်နဲ့

မင်းကအရှုံးပေးလိုက်တာလား ညီမလေး

အခုတော့ မဆုံးတဲ့လမ်းကို

မင်းအစာ ငါလျှောက်နေရပြီ

မင်းကဘယ်ဆီမှာလဲ

ညီမလေး...

ငါ့ရဲ့ လိပ်ပြာကြိုးလေးရေ...

-သွင်ထူးသာ